الى كل الوطن
الى الناس اللى غرقانة لشوشتها فى المحن
الى اللى عايشين...................... ومش عايشين
متسرطنين
والهم راكب فوق قلوب الخلق ....من سنين
اكلين...... آنين
لابسين...... آنين
خايفين
يتسرق حلمهم
والحلم اصلا كره القعاد
مع ناس بتسرق الحلم من قلب العباد
كره القعاد مع ناس جماد
الى كل الوطن
الى الشعب اللى صار حالوا .....حزن
وهو اللى فاتت عليه المحن
مقدرتش يوم تدارى ضحكتك
مين سكتك......؟؟؟؟
مبن موتك......؟؟؟؟
مين اللى شال البسمة وطفى الشموع
مين اللى خلى القلب بيحب الدموع
مين اللى قال ان مصر فى يوم ممكن تجوع
هرب الحلم وسابنا اشباه بشر
حتى القمر
مرضيش يرملنا شعاع
على ناس سابت الوطن فى يوم يتباع
وكأنهم ماعاشوا على ترابوا
ولاتوضوا ولاصلوا فى محرابوا
الى كل الوطن
الى اللى سابك من زمن
تاكل فيك الدياب ......... والكلاب
وكأن اللى بتموت
........مش لحمنا
..............ولادمنا
..............ولا حلمنا
...................ولا امنا
وكأننا متخدرين
شافين وعاملين مش شايفين
آآه ياوطن
باعوك فى سوق النخاسة
وبقيت عبد للقمتك
ولهدمتك
سابوك تستنى عطف الدولار
والدينار
وانت اللى الكل شاف خيرك
وفاض عطفك على غيرك
لكن مسيرك ياوطن ترجع تلالى
ترجع تنور فى العلالى
بس محتاج ولادك تفوق
يطلعوك هما فوق
ويخلصوك من كل الديابة
من كل تشكيل العصابة
من كل مين خلاك خرابة
وتفرد جناحك على شرقها وغربها
وتخلى اهلك من تانى تحمد ربها
